Dem leeven J

Dat fängk jo allt jot aan!

Et säät mer ens einer, der sich mem Böcherschrieve vill besser uskennt als wie ich: jo, et wör wohrhaftich e wunderbar Jeföhl, e Boch jeschrevve ze han! Ävver e Boch ze schrieve, dat wör doch zemlich aanstrengend, un mer dät verdammp vill Üvverraschunge und Alterazijone erlevve.

Zickdem ich mi eeschtes eijenes Boch am schrieve ben, kann ich dä Ein luuter besser verston! Mir ess dodrüvver erus och klor wode, wievill Mot mer bruch, öm Kölsch ze schrieve! Immer widder ben ich mer nit em Klore dodrüvver, ov dat, wat ich do jrad dun, üvverhaup ene Senn jitt, ov et üvverhaup einer intresseet!

Dobei schrieven ich allt lang. Mer mööch sare, sulang wie ich Käl ben.

Ich bekritzelten immer schon jede erömflejende Zeddel met neu Enfäll. Die Zeddel stoppten ich en Katöngche, die bes hück brav jeden Ömzoch metmaache. Ming Fänte dun mer hück allt leid, wann se die Katöngche späder ens finge (kein Schohnskatöngche, jangk mer fott!, et sin jetz allt zwei jroße Ömzochskatongs!).

Us mänche Enfäll wooten dann en stille Stündche Verzällche, Rümche und Leedche. En mingem „eeschte“ Levve, also wie ich et eeschtemol verhierot wor, wo die zwei muntere Fäntche Jan un Tim dann erenje­bore wode sin, die ich späder met mingem Katong-Jeschnipsel ver­schreck maachen dät, komen stille Stündche kaum ens vör, also schreff ich aan der lange Hotel-Ovende, die ich enläje moot, weil ich en der janze Republik am erömfleje wor, öm Döktersch enzerichte.

Kaum ömkumme vun der Jeschäffsreise, daut ich dat Jeschrevvene en Odener un stoppten die en et Rejal, un dann komen die Stöckelcher hühkstens ens bei Jebotsdäch un ander Familije-Krippche op et Tapet.

Vill Zick ess verstriche, bes ich et eeschtemol ens die Froch ho´t: „Kannste nit ens … ich hätt do en der Firma en Red ze halde, ävver ich weiß nit räch, wat mer do sare soll … unesuwigger.“